تعلیمسماجی علوم

بورڈ گیمز: سیکھنے کا نیا انداز

بورڈ گیمز قدیم زمانوں سے بچوں اور بڑوں دونوں میں یکساں طور پر مقبول رہے ہیں۔ گجرات میں وادیٔ سندھ کے ایک مقام سے پاسوں کی دریافت اس بات کا واضح ثبوت ہے کہ ہڑپہ کے لوگ بھی بورڈ گیمز کھیلا کرتے تھے۔ ان کھیلوں کا ذکر ادب میں بھی ملتا ہے، اور انہیں مجسمہ سازی اور مصوری میں بھی نمایاں طور پر دکھایا گیا ہے۔ مہابھارت میں پاسوں کا ایک کھیل پانڈووں کے اپنی سلطنت سے محروم ہونے کا سبب بنتا ہے۔ چوسر ایک ایسا پاسوں کا کھیل ہے جو لڈو(Ludo) سے کافی مشابہت رکھتا ہے۔ دیگر مقبول بورڈ گیمز میں پچیسی، موکش پٹم، چتورنگ، اشٹا چمّا، چوپر، واگھ بکری وغیرہ شامل ہیں۔ آج کی نسل رسک، شطرنج، چائنیز چیکرز، مونوپولی، بزنس اور اسکریبل جیسے بورڈ گیمز سے بھرپور لطف اٹھاتی ہے۔

تفریح کے علاوہ، بورڈ گیمز سیکھنے کا ایک مؤثر ذریعہ بھی بن سکتے ہیں۔ مختلف تصورات کو بورڈ گیمز کی مدد سے خوشگوار اور دلچسپ انداز میں دہرایا جا سکتا ہے۔ یہ کھیل نہ صرف کھیلنے میں مزے دار ہوتے ہیں بلکہ انہیں بنانا بھی ایک خوشگوار تجربہ ہوتا ہے۔ طلبہ چند رہنما اصولوں پر عمل کرتے ہوئے اپنے سماجی علوم سے متعلق بورڈ گیمز خود ڈیزائن اور تیار کر سکتے ہیں:

• جب آپ ایک بورڈ گیم ڈیزائن کرنا چاہتے ہیں تو سب سے پہلے اس کا مقصد طے کریں۔ مثال کے طور پر، لُڈو(Ludo) کا مقصد درمیان میں موجود گھر تک پہنچنا ہوتا ہے، جبکہ شطرنج کا مقصد حریف کے بادشاہ کو مات دینا ہوتا ہے۔
• یہ طے کریں کہ کھیل کے دوران کھلاڑی کیا سیکھیں گے۔
• اس کے بعد کھیل کے طریقۂ کار کی منصوبہ بندی کریں، یعنی کھیلنے کے لیے کیا کیا کرنا ہوگا، جیسے پاسا پھینکنا، مہرے چلانا، اسٹرائیکر کا استعمال کرنا وغیرہ۔
• ان اجزاء کے بارے میں سوچیں جو آپ کھیل میں استعمال کرنا چاہتے ہیں، جیسے بورڈ، مہرے، پاسا، کارڈز وغیرہ۔
• پھر کھیل کے اصول مرتب کریں۔
• اپنے کھیل کو ایک دلچسپ نام دیں۔

ذیل میں سماجی علوم سیکھنے کے لیے تیار کیے جا سکنے والے چند بورڈ گیمز کی مثالیں پیش کی جا رہی ہیں:

کھیل 1: یہ کھیل بھیڑ بکری پر مبنی ہے، جو بھارت کا ایک قدیم کھیل ہے۔ اس میں بورڈ شکل 1 کے مطابق تیار کیا جاتا ہے۔

کھیل کا مقصد: حریف کے ابتدائی مقام تک پہنچنا۔

کھیل کے اجزاء: بورڈ، پاسا یا کوڑیاں، دو مختلف رنگوں کے مہرے – ہر کھلاڑی کے لیے ایک۔

طریقۂ کار: کھلاڑی پاسا پھینکتا ہے اور اپنے مہرے کو آگے بڑھاتا ہے۔

قواعد: کھلاڑی اپنے مہرے کو اسی وقت چلانا شروع کر سکتا ہے جب اسے پاسے میں چھ حاصل ہو۔ کھلاڑی A کی حرکت کی سمت نیچے دی گئی ترتیب میں تیروں کے ذریعے دکھائی گئی ہے۔ اگر وہ کھلاڑی B کے ابتدائی مقام تک پہنچ جائے تو وہ جیت جاتا ہے۔ کھلاڑی B بھی باری باری پاسا پھینکتا ہے اور اپنے مہرے کو اپنے ابتدائی مقام سے چلاتا ہوا کھلاڑی A کے ابتدائی مقام تک پہنچانے کی کوشش کرتا ہے۔ اگر کسی کھلاڑی کا مہرہ دوسرے کھلاڑی کے مہرے والی ہی خانے میں آ جائے تو جو کھلاڑی پہلے وہاں موجود تھا اسے اپنا مہرہ واپس اپنے ابتدائی مقام پر لے جانا ہوگا۔

اب اس کھیل کو سماجی علوم کے ساتھ جوڑتے ہیں۔ کچھ خانوں میں اس مضمون سے متعلق سوالات رکھے جا سکتے ہیں۔ کھلاڑی کو آگے بڑھنے کے لیے متعلقہ خانے کے سوال کا درست جواب دینا ہوگا۔ اگر وہ درست جواب نہ دے سکے تو اسے ایک خانہ پیچھے جانا ہوگا اور اس کے حریف کو پاسا پھینکنے کا موقع ملے گا۔ پاسے کے بجائے چار کوڑیاں بھی استعمال کی جا سکتی ہیں۔ کھلاڑی کوڑیاں پھینکتا ہے اور جتنی کوڑیاں کھلی جانب اوپر ہوں، اتنے خانے آگے بڑھتا ہے۔ اگر تمام کوڑیاں الٹی جانب گریں تو اسے آٹھ شمار کیا جاتا ہے۔ قطاروں، ستونوں اور سوالات کی تعداد آپ اپنی ضرورت کے مطابق بڑھا سکتے ہیں۔

B کے لیے آغاز / A کے لیے اختتام

↓ →
دریائے دجلہ کے کنارے کون سی قدیم تہذیب آباد تھی؟ نقشوں کی کتاب کو کیا کہا جاتا ہے؟
دنیا کے سب سے لمبے دریا کا نام بتائیں۔

↑
↑ گجرات کا وزیر اعلیٰ کون ہے؟

ہڑپہ کے کھنڈرات کس نے دریافت کیے؟

↓
میونسپل کارپوریشن کا سربراہ کون ہوتا ہے؟

آسٹریلیا کا دارالحکومت کیا ہے؟

دنیا کی سب سے بلند چوٹی کون سی ہے؟ ↓

↑
↑ → Aکے لیے آغاز / B کے لیے اختتام

کھیل 2: ایک بورڈ پر سانپ سیڑھی کے کھیل کی ترتیب بنائیں اور اسے رنگوں سے خوبصورت کریں۔ ہر سیڑھی کے نچلے خانے اور ہر سانپ کے منہ والے خانے میں تاریخ، جغرافیہ، شہریات یا معاشیات سے متعلق ایک سوال لکھیں۔

اس کھیل کے اصول عام سانپ سیڑھی جیسے ہی رہیں گے، فرق صرف یہ ہوگا کہ جب کھلاڑی کسی سیڑھی پر پہنچے گا تو وہ اسی وقت اوپر جا سکے گا جب وہ دیا گیا سوال درست جواب دے۔ اگر وہ کسی سانپ کے منہ تک پہنچے اور سوال کا صحیح جواب دے دے تو وہ اسی خانے میں رہ سکتا ہے، لیکن اگر جواب غلط ہو تو اسے سانپ کے ذریعے نیچے آنا ہوگا۔سوالات مختلف موضوعات پر مبنی ہو سکتے ہیں، جیسے ممالک اور ان کے دارالحکومت، ریاستیں اور ان کے دارالحکومت، جنگلی حیات اور قدرتی نباتات وغیرہ۔

کھیل 3: اس کھیل کے لیے لُڈو سے مشابہ ایک منظم اور واضح بورڈ تیار کیا جا سکتا ہے۔

مقصد: بورڈ پر مرحلہ وار آگے بڑھتے ہوئے درمیان میں واقع گھر تک پہنچنا۔

اجزاء: لُڈو(Ludo) کے طرز کا بورڈ، ایک پاسا، اور چار مختلف رنگوں کے مہرے، ہر کھلاڑی کے لیے ایک مخصوص مہرہ۔

قواعد: چاروں کھلاڑی باری باری پاسا پھینکتے ہیں۔ جس کھلاڑی کے پاسے میں سب سے زیادہ عدد آئے، اسے ایک منٹ تک بلا توقف، بلا جھجک، بغیر تکرار اور بغیر موضوع سے انحراف کے سماجی علوم سے متعلق کسی موضوع پر گفتگو کرنی ہوگی۔ یہ موضوع کسی ملک، ریاست، براعظم، شہر، تاریخی شخصیت، آب و ہوا یا آلودگی وغیرہ سے متعلق ہو سکتا ہے۔ تمام کھلاڑیوں کے لیے پہلے سے ایک مشترکہ موضوع بھی متعین کیا جا سکتا ہے، جیسے "سفر”۔ اگر کھلاڑی پورے ایک منٹ تک روانی اور تسلسل کے ساتھ گفتگو مکمل کر لے تو وہ پانچ خانے آگے بڑھے گا۔ بصورت دیگر اسے دو خانے پیچھے ہٹنا ہوگا۔ جو کھلاڑی سب سے پہلے منزل یعنی گھر تک پہنچ جائے گا، وہی فاتح قرار پائے گا۔

کھیل 4: اسکریبل (Scrabble) کو سماجی علوم کے ساتھ مربوط کیا جا سکتا ہے۔ کھلاڑیوں کے درمیان حروف والے ٹکڑے برابر تقسیم کر دیے جائیں۔ اس کھیل میں اسکریبل (Scrabble) کے تمام قواعد و ضوابط کی پابندی کی جائے گی۔ تاہم اس میں کھلاڑی صرف ممالک، براعظموں، شہروں، قصبوں، دیہاتوں یا ریاستوں کے نام ہی بنائیں گے۔

کھیل 5: پچاس کارڈز کا ایک مجموعہ تیار کریں جن پر مختلف ممالک (Countries) کے نام لکھے ہوں۔ پھر مزید پچاس کارڈز تیار کریں جن پر ان ممالک کے دارالحکومت (Capitals) درج ہوں۔ اس طرح سو کارڈز کے اس مجموعے کو اچھی طرح ملا لیں۔

یہ کھیل دو یا زیادہ کھلاڑی کھیل سکتے ہیں۔ ہر کھلاڑی کو دس دس کارڈز دیے جائیں گے۔ سب سے پہلے تمام کھلاڑی اپنے پاس موجود کارڈز میں سے ممالک اور ان کے دارالحکومتوں کے جوڑے (Sets) بنائیں گے اور انہیں اپنے سامنے رکھ دیں گے۔

اس کے بعد ایک کھلاڑی درمیان میں ایک کارڈ کھولے گا۔ اگر اس پر کسی ملک کا نام ہو تو وہ کھلاڑی جس کے پاس اس کا دارالحکومت والا کارڈ موجود ہو، اپنا کارڈ ڈال کر جوڑا مکمل کرے گا اور اسے اپنے دیگر جوڑوں میں شامل کر لے گا۔ اگر کھولا گیا کارڈ دارالحکومت کا ہو تو وہ کھلاڑی جس کے پاس متعلقہ ملک کا کارڈ ہو، جوڑا بنا سکتا ہے۔ اسی طرح کھیل جاری رہے گا اور جس کھلاڑی کے پاس سب سے زیادہ جوڑے ہوں گے، وہی فاتح قرار پائے گا۔

کھیل 6: ایک ایسا بورڈ تیار کریں جس میں جالی نما خانے ہوں، جیسا کہ شکل 2 میں دکھایا گیا ہے۔ ہر خانے میں کسی ملک (Country) کا نام لکھا جائے۔ ہر کھلاڑی کو دس کارڈز دیے جائیں گے (جیسا کہ شکل 3 میں ہے) جن میں ہر کارڈ پر کسی ایسی چیز کی تصویر یا نام درج ہوگا جو ان ممالک سے متعلق ہو۔ یہ چیزیں یادگار عمارتیں، کھانے، لباس، نباتات، حیوانات، مشہور شخصیات یا قومی علامات جیسے جھنڈا، قومی جانور، پرندہ، پھول، سبزی، پھل وغیرہ ہو سکتی ہیں۔

جو کھلاڑی پہلے کھیل شروع کرے گا، وہ ایک کارڈ منتخب کرے گا اور اسے اس ملک کے خانے میں رکھے گا جس سے وہ چیز زیادہ متعلق ہو۔ اگر اس کی جوڑ درست ہو تو اسے پانچ نمبر ملیں گے۔ اس کے بعد اگلے کھلاڑی کی باری آئے گی اور وہ بھی اپنا کارڈ اس ملک کے خانے میں رکھے گا جس سے اس کا تعلق زیادہ ہو۔ اسی طرح کھیل جاری رہے گا اور جو کھلاڑی سب سے زیادہ نمبر حاصل کرے گا، وہی فاتح قرار پائے گا۔ یہ کھیل کسی ایک ملک کی ریاستوں (States) کے ساتھ بھی اسی انداز میں تیار کیا جا سکتا ہے۔

افریقہ آسٹریلیا بھارت کینیڈا امریکہ سری لنکا
بھوٹان نیپال مصر فرانس جرمنی ارجنٹینا
بنگلہ دیش برازیل ڈنمارک یونان آئس لینڈ نیوزی لینڈ
انڈونیشیا اٹلی جاپان کینیا مالدیپ ماریشس
میکسیکو ناروے فلپائن اسپین سوئٹزرلینڈ سویڈن
زامبیا برطانیہ ترکی تھائی لینڈ پیرو پرتگال

شکل 2

شکل 3 میں دیے گئے خانوں کو لکیروں کے ساتھ کاٹ کر الگ الگ کارڈز بنا لیں، جنہیں بورڈ پر ممالک کے خانوں پر رکھا جا سکتا ہے۔ ہر ملک کے لیے مختلف چیزوں کے مزید کارڈز بھی تیار کیے جا سکتے ہیں۔

دریائے ایمیزون دارالحکومت: پورٹ لوئس کرنسی: ین آرٹیزین کنویں اہرامِ مصر
کرنسی: بھات ڈولفن اسٹیچو آف یونٹی دریائے ٹیمز میڈونا
چیری بلاسم پیزا دریائے نیل دارالحکومت: واشنگٹن ڈی سی ہالی ووڈ
شیر مور کرنسی: پیسو ایئرز راک دنیا میں کافی پیدا کرنے والا سب سے بڑا ملک
کنول اوٹاوا ایفل ٹاور دارالحکومت: انقرہ قومی کھیل: تیر اندازی

شکل 3

مصنفہ : شالینی سابکھی

مترجم : سلمان وحید

مصنفہ کے بارے میں

مصنفہ احمد آباد کے ویجالپور میں واقع زائڈس اسکول فار ایکسیلنس (Zydus School for Excellence) میں معلمہ ہیں۔ وہ سماجی علوم پڑھاتی ہیں۔ انہیں دستکاری، سفر کرنا، سیکھنا اور اپنی سیکھ کو دوسروں کے ساتھ بانٹنا پسند ہے۔ ان سے اس ای میل پر رابطہ کیا جا سکتا ہے: [email protected]۔

ماخذ: ٹیچر پلس میگزین
اصل انگریزی مضمون کے لیے اس لنک پر کلک کریں

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے